praesidium receperat eo consilio se absente oppugnari iussit, quod
ad alia capienda regionis oppida intenderet proficisci. Sed adierunt,
priusquam movisset, qui sese illi sponte et necdum viso exercitu
permiserunt: vallis Isei incolae, omnesque municipiorum et castellorum
Abduensis Glareae oppidani, pariterque ex campestribus
Brixianis Casterzaghenses atque Travaiadenses. Postmodum Palatioli
arce septimo oppugnationis die, praesidio et custodibus cum
armis et vestimentis abire permissis, recepta, defecerunt a Venetis
Longena Mairanum et quicquid in ea obtinuerant regione. Quo die
item marchio Mantuanus arcem mediam pontis Valegii a custode
proditam praesidio communivit.
V. Sed erat forte tunc Pischeriae Sfortia, quem a Foscari
nuptiis vanoque pacis constituendae consilio acceptum in Clario
incommodum excitavit, eoque curante, duabus Valegii arcibus in
fide persistentibus tantum praesidii armamentorumque est impositum,
ut media arx perdita, cuius recuperationi nequiret intendere,
nullam esset molestiam provincialibus allatura. Constituerat vero
copias omnes, quae in Paduanis Vicentinis Veronensibusque hibernabant,
Pischeriam contrahere, aliis, quae apud Brixiam convenerant,
ut sese par hosti opponeret, adiuncturus. Sed multi certique
nuntii attulerunt: Ciarpellonum, quem ostendimus a se per fugam
Piccinino additum a Philippo, rumorem disseminasse, functum se
fato, quo sibi olim domestici omnes et ipse imprimis praedixerit
pereundum: Venetos, superbam perfidamque gentem, illum securi
quemadmodum antea Carmagnolam percussisse; inde factum esse
ut Abduensis Glareae oppidani arciumque custodes defecerint ad
Philippum. Ea autem mortis Sfortiae opinio non solum illos qui
rebellaverant suae blandientes perfidiae, sed Brixianam quoque
invaserat plebem, ratam praestantem et insigni elatum recenti
victoria ducem Sfortiam, si salvus et liber esset, numquam in ea
propinquitate eiusmodi motus fuisse tanto tempore contempturum;
et si quae ab ilio litterae perferebantur, eas commenticias adulterinasque,
nuntios vero, qui de illius accessu dicerent, subornatos a
studiosis partium reputabat. Quam ob rem Sfortia, reiecta in ver
instans expeditionis parandae cura, trecentis comitatus equitibus
Brixiam se contulit; quem Brixiani populariter obvii et fusi in
praetorianas aedes deductum magnis muneribus donaverunt.
VI. Recepit tamen eodem die Iseum Piccininus, et in Francecurtanos
postera die ducens, Passiranensibus Bornadensibusque et
|
|