XI.
De milite ad militem qui petit aliquid sibi commodari.
Egregio ac magnifico viro domino B. de Mutina militari
gloria decorato, V. miles de Bononia salutem et prospera prosperis
cumulare. Ad vestre benevolentie puritatem confidenter
accedimus, et ad vestre gratie largitatem valde tractabilem
et benignam sine dubitatione mittimus scripta nostra, tanquam
ad illum cuius liberalitas comprobata nullam novit repulsam,
sed ut aurum examinatum rutilat in negotiis amicorum. Rogamus
equidem generositatis vestre laudabilem probitatem ut,
in signum amoris precipui, nobis vestrum pallafredum, quo
fortiter indigemus, mittere et commodare velitis per eumdem
qui vobis nostras litteras presentabit, attendentes, quod ordo
rationis expostulat, ut amicorum alter alterius precibus condescendat.
Habere poteritis memoratum, cum de vestra fuerit
voluntate.
XII.
Ad predictam responsiva grata ex parte accommodantis.
Vestris petitionibus grato concurrentes assensu, pallafredum
vobis mittimus postulatum, vos instanter et affectuosius rogitantes,
ut tam de ipso quam de aliis rebus nostris, que vestra
debetis et potestis merito computare, facere velitis vestre beneplacitum
voluntatis; considerando quod dicitur per prudentem
«Res cara est danti de qua gaudet amicitia postulantis.»
XIII.
Ad predictam responsiva contraria non accommodantis
rem petitam.
Quia pallafredus noster, immo vester et vestris servitiis deputatus,
non exit de stabulo, inclavatus fortiter propter imperitiam
|
|