Et, predictis sic confectis, in continenti ecce quod supervenerunt in provincia Romaniole
nuncii summi pontificis domini Nicholai pape tercii qui, per singulas terras Romaniole properantes,
et in civitate Bononie, mandaverunt ut per quaslibet comunitates terrarum, et etiam
parcium expulsarum de qualibet terra, sindici legittime constituti mitterentur ad romanam curiam,
causa conpromittendi in summum pontificem supradictum de discordiis, que partes cuiuslibet
civitatis dicte provincie haberent ad invicem. Et sic per comune Faventie, quod dominabatur
tunc pars Acharixiorum, fuerunt sindici ordinati d. Bonaventura Fuscoli et ego
Petrus Cantinelli, et, dicta occasione, ivimus ad romanam curiam, ubi nos presentavimus
in civitate Viterbii coram summo pontifice. Et ibidem fuerunt sindici partis Manfredorum et sindici
partis Geremiorum et partis Lanbertaciorum de Bononia et cuiuslibet partis de civitatibus
Imole, Forlivii, Cesene, Ravenne, Cervie, Forlinpopilii, Bretenorii et Bagnacavalli, de
mense iulii anni predicti. Et demum, omnibus tractatis per dictos sindicos cum domino Matheo
Rubeo cardinali, nomine dicti summi pontificis, facta fuerunt, per dictos sindicos dictarum terrarum,
generaliter conpromissa alte et basse indictum summum pontificem; postmodum vero
voluit et petiit idem summus pontifex, et super hoc misit etiam suos nuncios per provinciam
Romaniole, ut, per quaslibet terras et partes terrarum, sindici ordinarentur et fierent ad faciendam
fidelitatem summo pontifici supradicto et romane ecclesie, et ad recognoscendum
et demonstrandum omnes et singulas terras provincie Romaniole et civitatem Bononie esse
de iurisdictione et de principatu romane ecclesie, cum omnibus et singulis comitatibus et districtubus.
Et sic predicti sindici constituti fecerunt, et postea, per singulas dictas terras nuncii
summi pontificis accesserunt, facientes ratificari per singula comunia terrarum que per eorum
sindicos facta erant, et facientes omnes et singulos homines a XIV annis supra et a LXX infra
iurare fidelitatem predictam summo pontifici et romane ecclesie. Et sic factum est. Nuncii
vero summi pontificis, qui venerunt in Romania pro predictis, fuerunt dominus Guilielmus
Durantis canonicus carnotensis capellanus domini pape, frater Iohannes de Viterbio et frater
Laurentius de Todi ordinis Predicatorum.
|
|