………… aliqua concordare de ipsa tallia persolvenda, sed neque consilium populi, nec etiam
generale consilium, talliam solvere nolebant. Verum, illi de domo Argoglosiorum, cum eorum
sequacibus, studebant, et quidquid poterant faciebant, ut firmaretur quod tallia solveretur.
Calbolenses vero, cum eorum sequacibus, et etiam maior pars populi eiusdem civitatis, nunquam
solvere volebant, et, in quantum poterant, contradixerunt; propter que idem dominus, ad postam
et de voluntate Argolliosorum, misit pro guarnimento suo, faciens magnas minas ançianis
et popularibus, et quod mitteret ad confinia illos de Calboli et de eorum conplicibus,
qui contradicebant sibi in predictis; et fecit venire Forlivium, de fidelibus suis et fratrum
suorum, de Tredolcio, CCC homines, qui venerunt Forlivium die dominica III intrante februario
in mane, ante quam dies illucesceret; et expectabat illos de Dovadola et de Valbona; et
aliunde, ubicunque poterat, miserat pro guarnimento, intendens violenter talliam extorquere.
Cuius rei causa, ançiani populi Forlivii, et etiam populares eiusdem civitatis, miserunt
suas literas sigillatas sigillo populi, et nuncios speciales, ad comune Faventie, inplorantes
auxilium eorundem, dicta die dominica III februarii. Et, incepto rumore per ipsam civitatem
Forlivii, dictus dominus comes fecit publice proclamari quod omnes sui milites et stipendiarii,
cum armis et equis eorum, venirent in continenti ad pallatium populi, ubi idem dominus continue
morabatur, venire deberent; propter quod illi de Calbolo, cum eorum amicis, eques et pedes, reduxerunt
se in contrata, que vulgo dicitur Sclavania, ilucque expectaverunt donec illi de Faventia
fuerunt ibidem; quibus venientibus, contigit quod dominus Rainerius de Calbolo potestas et
dominus Maghinardus capitaneus Faventie, cum eorum milicia et maxenata in quantitate CC
equitum, et cum populo Faventino, tanquam leones intrantes ipsam civitatem Forlivii, equitaverunt,
euntes versus plateam civitatis eiusdem, facientes retrocedere milites domini comitis et
Argolliosios et eorum sequaces cum eorum exforcio. Et erant, cum dicto domino comite, fratres
sui comes Aghinulfus et comes Alexander de Remena, et comes Albertus de Mangone et
comes Açolinus de Mangone et Guilielmus et Petrus comites de Castrocario et frater Albericus
de Manfredis et multi alii nobiles et potentes viri, et habebat idem dominus comes bene
CCCC equites pro suis stipendiariis ibidem secum, qui omnes conversi sunt in fugam, et,
exeuntes per burgum de Codogno, aufugerunt aliqui ex eis usque ad castrum Bretenorii, aliqui
usque Cesenam, ubi dictus dominus comes aufugit: et, in ipso facto, mortuus fuit dominus Rainerius
de Abaisio de Bononia archipresbiter plebis de Silustra imolensis diocesis, et plures
alii, et multi fuerunt ibidem vulnerati et capti, inter quos captus fuit comes Aghinulfus de Romena
frater dicti domini comitis Romaniole, et ductus Faventiam, et Ubertus eius filius.
Et electus fuit, eo anno, potestas Forlivii dominus comes Bandinus de Mutilliana.
Eodem anno, die martis XXVI mensis februarii, dominus Fredericus de Acharixiis de Faventia
accepit in uxorem dominam Claram filiam condam domini Nicolai de Algeriis, que
condam fuerat uxor Albergitti filii Manfredi de Manfredis.
Et eo anno, et de mense ianuarii, fuit bonum tenpus atque tranquillum; verum, de mense
februarii, venerunt nives magne in montibus et planicie, et multe bestie mortue sunt, et fuit
maxima carastia omnium victualium. Eo anno fuit bisextus, et pacta nulla simul in eodem anno.
Item, eo anno et mense februarii, comune Forlivii, comune Faventie et comune Ravenne
contraxerunt societatem ad invicem, et factus est dominus comes Bandinus capitaneus generalis
dicte societatis.
|
|