5. E caelo tibi missa indignatio
gentem crudelem excitauit protinus,
quae properaret ad tuum interitum
solis ab ortu.
6. Fremens ut leo, Attila seuissimus,
ignorans deum, durus, impiissimus,
te circumdedit cum quingentis milibus
undique gyro.
7. Gestare uidit aues fetus proprios
turribus altis per rura forinsecus,
presciuit sagax hinc tuum interitum
mox adfuturum.
8. Hortatur suum ilico exercitum,
machinis murum fortiter concutiunt,
nec mora, captam incendunt, demolliunt
usque ad solum.
9. Illa quis dies luctus esse potuit,
cum inde flammae, hinc seuirent gladii,
et nec etati tenere nec sexui
parceret hostis?
10. Kaptiuos trahunt, quos reliquit gladius,
iuuenes, senes, mulieres, paruulos,
quicquid ab igne remansit diripitur
manu predonum.
11. Legis diuine testamentum geminum,
uel quae doctorum repperit ingenium,
subiecto igni concremauit etnicus
furor iniquus.
|
|