LXI. De capone et accipitre.
Querere diffugium, domino ueniente, caponem
Audax accipiter dum uidet, inquit ei:
«Quid fugis? Exsulta dominum cum cernis adesse,
Cuius in aduentu plaudere nitor ego».
«Me», capo respondit: «fratrum diuersa meorum
Terret pena; tibi non timor ullus adest.
Nil magis horrendum quam flebilis aula tiranni,
Qua pietas omnis cum ratione perit.
Raptores famulique truces scelerumque ministri
Iniustis dominis impietate placent.
Qui sine ui, sine fraude manent, hi fraude necantur:
Nullo damnantur crimine sepe boni.
Sic fratres periere mei. Te reddit amicum
Impietas domino nequitieque uigor.
Hi proprias lauere stolas in sanguine; passos
Martirium, sepelit uenter auarus eos.
Illius ergo timens adspectum credo latere
Tutius, ut morti me rapuisse queam».
Non amat insontes, sed sontes, aula tiranni:
Complacet iniusto raptor iniquus ero.
|
|