super hoc sibi per nostram Excellentiam
provideri, fidelitati tuae praecipiendo mandamus,
quatenus ad efficacem executionem et
celerem mandati praedicti, juxta priorum continentiam
literarum, quas propterea Petro
praefato direximus, sic omni dilatione postposita
solicitus et studiosus intendas: quod
idem spes hactenus praeconcepta fraudavit, necessitatum
suarum esuriem praesentis mandati
nostri suffragio sentiat mitigatam.
Cap. XXIV.
Cuidam ut non faciat repraesalias contra
Tudertinos, sed alleget jus suum in Imperiali
curia si quod habet.
Lecta nuper in auditorio Communis Tudertinorum,
nostrorum fidelium, supplex
petitio, continebat quod cum juvenis
quidam, nomine A. ad civitatem accederet,
et ibidem aliquandiu moraretur: quidam,
quorum nomina ignorare se dicunt, principales
se tuos nuncios asserentes, praefatum A.
proposuerunt quandam summam pecuniae, et
res alias sibi furtive surreptas secum clandestine
asportasse, super quo pro parte tua justitiam sibi
fieri postularunt. Quod cum Communi praedicto
ex nunciorum ipsorum propositione notesceret,
causam ipsam nolentes dare diffugio, in eorum
nunciorum conspectibus praesentato, quam juris
ordo deposceret, eis pro parte tua facere
justitiam obtulerunt: nec patientes, quod per
eorum incuriam vel per ejusdem malitiam negotium