Pag 322

noli aliquid enarrare." Erant autem ipse arbores excelse ualde.
Arbor uero solis habebat folia ut aurum purissimum rubicunda et
fulgida. Arbor uero lune habebat folia alba ut argentum. Dixit
Alexander seni: "Qua lingua michi responsum dabunt arbores?"
Cui senex ait: "Arbor solis Indico sermone incipit et responsum
suum Greco sermone diffinit. Arbor uero lune Greco sermone
incipit et Indico determinat" etc.
Qualiter dicte arbores indicauerunt Alexandro, quot mensibus deberet uiuere etc.
Tunc Alexander cepit osculari arbores et in corde suo
cepit cogitare, si cum triumpho uictorie deberet Macedoniam
remeare. Tunc arbor solis Indico sermone respondit: "Tu dominator
orbis, dominus simul et pater (i. m.: estis. Et)* Patrium
regnum per tempora nulla uidebis." Deinde dixit arbor lune:
"Anno completo uiues et mensibus octo, de quo confidis tibi
mortis pocula dabit." Tunc Alexander cepit in mente sua dicere:
"Dic michi, sacratissima arbor, quis me debet occidere?" Tunc
arbor respondit: "Si tibi pandetur, qui tua fata resoluet, illum
confringes et sic mea carmina fallunt."
Qualiter Alexander uenit ad exercitum suum etc.
Inter hec dixit senex: "Noli amplius molestare arbores
futurorum interrogacionibus. Sed post tergum reuertamur!"
Itaque reuersus est Alexander post tergum plorans amarissime.
Cumque uenisset ad ipsum palacium, ait senex ad Alexandrum:
"Post tergum reuertere, quia ultra procedere nemini est concessum.
Si autem uolueris per septemtrionalem plagam iter arripere,
poteris, sed non per longa terrarum spacia, transire." Et hiis
dictis intrauit senex palacium. Alexander autem et principes eius
descenderunt per gradus ad castra etc.
Qualiter Alexander fecit erigi columpnas marmoreas
Alio itaque die amoto exercitu cepit redire et peruenire
de die in diem ad ipsum introitum, ubi planicies illa maxima
finiebatur. Et castrametatus est ibi. Et in eodem loco Alexander
fecit inter utrasque uias columpnas marmoreas erigi et
in medio illarum assidem in memoriam constitui, in qua litteris
Grecis, Indis, Hebraicis et Latinis erat scriptum: "Ego, Alexander,
filius Philippi Macedonis, hanc assidem erexi post confusionem
Darii, regis Persarum. Quicumque uoluerit ulterius pertransire,
manu sinistra tendat. Qui enim manu dextra incesserit,
multa inueniet obstacula, que suum impedient gressum." etc.