Salimbene de Adam: Cronica

Pag 497


Io. XII, et quia manna, que fuit figura Dominici corporis,
similitudinem simile dicitur habuisse.
Quinto et ultimo, assimilatur melli. Et sapientia increata
de se dicit, Eccli. XXIIII: Spiritus meus super mel dulcis, et
hereditas mea super mel et favum. Item ab Ecclesia de Christo
cantatur: De ore prudentis procedit mel, dulcedo mellis est lingua
eius. Bene ergo dicitur in Exodo XVI quod manna erat quasi
semen coriandri album, gustusque eius quasi simile cum melle,
ex quibus fit delicatissimus cibus. Unde illud Eze XVI: Similam
et mel et oleum comedisti, et decora facta es vehementer nimis et
profecisti in regnum. Verba Domini sunt ad Ierusalem sive ad
animam. Ad hunc cibum manducandum invitamur a Psalmista:
Gustate et videte quoniam suavis est Dominus. Hinc Apostolus
dicit, ad Hebreos VI: Gustaverunt donum celeste et participes facti
sunt Spiritus Sancti, gustaverunt nichilominus bonum Dei verbum
virtutesque seculi venturi. Item de se ipso dicit ipse Dominus ad
Augustinum: «Cibus sum grandium, cresce, et manducabis me.
Non ego mutabor in te sicut cibus carnis tue, sed tu mutaberis
in me». Et revera talis est mutatio dextere Excelsi, quando homo,
qui prius erat carnalis, totus efficitur spiritualis, quia «gustato
spiritu desipit omnis caro».
Et quia manna dulcedini mellis assimilatur, videndum est
quid de melle Sapiens dicit, Prover. XXIIII: Comede, fili mi,
mel, quia bonum est, et favum dulcissimum guturi tuo. Et iterum
Prover. XXV: Mel invenisti, comede quod sufficit tibi, ne forte
satiatus evomas illud. Item Prover. XXV: Sicut qui mel multum
comedit, non est ei bonum, sic qui perscrutator est maiestatis, opprimetur
a gloria. Item mensura istius cibi, scilicet mannatis,
erat gomor, sicut Moyses dicit, Exodi XVI: Hic est sermo quem
precepit Dominus: Colligat ex eo unusquisque quantum sufficiat
ad vescendum, gomor per singula capita. Gomor autem decima pars
est ephy. Ephy vero, sicut habetur Ruth II, tres modios capit.
Modius vas est, sicut apud nos appellatur sextarius vel mina.
Unde Dominus dicit, Luc. VIII: Nemo autem lucernam accendens
operit eam vase. In Mat. V sic habetur: Neque accendunt lucernam
et ponunt eam sub modio, sed super candelabrum, ut luceat omnibus

Torna all'inizio