IIB
(Ad amicum ignotum)
…………………………………………………………………
Filius ille dei, caeli quem summus ab arce
uoce pater clara testatur: “Filius” inquid
“ecce meus hic est, mando, carissimus, ipsum
audite et ille deuotas sternite mentes”.
Dixerat ista pater, quando Iordanis in unda
auctor erat uitae testis baptista Iohannis.
Dixerat et, quando praecelso in uertice montis
fulgebat super omne decus, radiabat amictu,
testis erat Petrus fidus Iacobque Iohannis.
Ipse pius, princeps mitis, gratissime clemens
te saluet seruetque, regat, sine fine gubernet,
ad caeli mittat splendentis lucida regna.
Tantas namque fero summissa mente salutes,
quantas alta poli stillabunt sidera flammas,
quantas tellus habet sub caeli cardine glebas
fluctiuagasque uomit quantas nam pontus harenas.
|
|