De pace Reginorum, quam mutuo fecerunt inter se anno Domini MCCLII.
Eodem anno, scilicet MCCLII, facta fuit pax inter Robertos
et illos de Foliano et de omnibus aliis forbannitis qui expulsi
fuerant de civitate Regina, in XV° die exeunte Augusto et in
ecclesia Sancti Laurentii, per fratrem Egidium de religione Sancte
Trinitatis de Campagnola, qui fuit de Verona, et per dominum
Guilielmum episcopum Reginum de Foliano. Et fuerunt facti
anciani pro bono civitatis Regii et electi ad sortem in consilio
generali; et in primis fuerunt XII. Et eodem anno predicti
anciani, die Sabbati XV° exeunte Augusto, voluntate et parabola
consilii communis more solito in palatio Communis Regii congregati
iuraverunt pacem et concordiam cum domino Guilielmo predicto
Regino episcopo et cum Reginis deforis pro eis et Reginis
intus civitatem Regii, ad honorem Dei et beati Prosperi et sancti
Grixanti et ad bonum statum civitatis Regii. Et eodem anno
venit pruina magna, die Dominico XIII exeunte Maio, que destruxit
vineas in pluribus locis.
Quod dominus Ghibertus de Gente, videns quod tempus eum iuvat, intromisit
se de pace Reginorum.
Anno Domini MCCLIII, indictione XI, fuit factus dominus
Guido de Gente, civis Parme, potestas Reginus per dominum Ghibertum
de Gente, eius fratrem, tunc potestatem Parme, in concordia
partis deforis et in concordia partis intus civitatis Regii.
Et eodem anno, die Martis quarto exeunte mense Octobris, in
festo beatorum apostolorum Symonis et Iude, dominus Ghibertus
de Gente, potestas civitatis Parme et communis, cum ancianis
consortii Sancte Marie Virginis Parmensis civitatis et cum aliis
bonis hominibus eiusdem civitatis iverunt ad portam Sancte
Crucis cum omnibus hominibus civitatis Regii et duxerunt dominum
venerabilem et electum Guilielmum de Foliano episcopum
Reginorum, cum aliis omnibus hominibus de parte deforis, in
civitatem Regium cum magna leticia et cum crucibus et vexillis
|
|