qui ipse Iohannes omnia templa ydolorum exterminauit et suburbana
ciuitatis Spolitinae in subsidio montis ecclesiam Beati Petri
Apostoli mirae magnitudinis edificauit. Sanctus Britius Baniae
ciuitatis Vincentium episcopum ordinauit. Et Victonae ciuitatis
Scripiodotum episcopum consecrauit, quod ei beatus Petrus apostolus
docuerat. Perusinae ciuitatis nepotem suum Herculanum
episcopum ordinauit; qui de episcopatu meruit tenere triumphum,
et martyrii coronae meruit tenere palmam.
Quidem perfidus Totila rex septem annis obsedit eamdem
ciuitatem, et fame captiuauit eam, <et> quid de Herculano episcopo
esset facturus, cogitabat. Tunc iussit ei corrigiam a capite
usque ad calcaneum decoriari, et postea caput eius super muros
ciuitatis abscidere, corpus eius foras proicere, ne tumulo traderetur.
|
|