dominum nostrum incipiat abbas ymnum Veni creator spiritus . Quo a conuentu
deuote et solenniter decantato, dicat collectam Sancte spiritus qui
te deum ac dominum . Qua dicta surgat nouitius et spargat super eum abbas
aquam benedictam eoque stante benedicatur cuculla et aspergatur aqua
benedicta. Qua benedicta accedat nouitius ad abbatem et flexis genibus
stet ante eum, quem tunica exuens abbas dicat Exuat te dominus ueterem
hominem cum actibus suis . Et induens eum cuculla subiungat Induat te
dominus nouum hominem, qui secundum deum creatus est in iusticia et sanctitate
ueritatis . Ad utrumque respondeant audientes fratres Amen . Subsequatur
super eum flexis genibus inclinatum oratio Deus misericors deus clemens .
Qua dicta osculetur eum abbas induens caput eius capitio; dehinc
ducatur per chorum ad osculandum omnes fratres, ultimus collocetur.
Tribus diebus communionem corporis et sanguinis Christi accipiat.
Tercia die ad pacem missae auferat ei capitium de capite abbas uel cui
abbas praeceperit, si ipse id faciendi opportunitatem non habet. Ante
hanc horam ex quo benedictus est summum silentium teneat, de capitulo
facto sermone exeat, ad processionem non uadat, cuculla indutus
cucullato capite dormiat. In primo autem capitulo quo ei licet loqui
debet magister eius de eo memoriam habere coram abbate dicens Domine
si placeret uobis praecipere, posset iste frater ab hac die in antea legere et cantare
in conuentu sicut alii fratres . Respondente abbate Faciat cum benedictione dei
inclinet ipse nouitius ad abbatem de loco in quo sedet. Ex illa die cuiuscunque
ordinis sit habet licentiam exsequendi omnia, quae sui ordinis
sunt, nisi sit sacerdos. Ipsi enim infra primum conuersionis suae annum
missam celebrare non licet, nisi in saeculo probatae castitatis fuerit et
abbas pro hac re specialem ei licentiam dederit.
|
|