Rara fides Liguris; violat rex federa pacis;
Federis ante dati iam nexibus evacuatis,
Concutitur gratis papa dolore satis.
Hec ubi Roma sapit, doluit rebus variatis,
Stat quasi fracta ratis vel preda parata piratis,
Undique quassatis rebus et igne datis.
EXPLICIT PARTICULA XXII. INCIPIT PARTICULA XXIII.
1. Karolus Magnus erigitur in regnum Francorum, mortuo Pipino.
Anno ab incarnatione Domini 768, imperante adhuc in Grecia Constantino quinto, Karolus Magnus,
filius Pipini Nani, regnum dividit cum fratre suo Karlomanno, et incipit regnare. Iste primo loco Hunaldum,
qui, occiso duce Guaifario, bellum in Aquitania renovabat, ad Lupum ducem Guasconie fugavit, et postmodum tam
ipsum quam Lupum in deditione accepit. Inde sequenti anno in Guormatia generali curia celebrata, limina apostolorum
causa orationis visitare disponit. Anno tertio regni eius Karlomannus, frater eius, moritur, et uxor eius cum filiis
ad Desiderium regem Lombardorum confugit. Karolus itaque iam solus regnum adeptus, Saxoniam cum exercitu
ingreditur, omnibusque ferro et igne vastatis, acceptis obsidibus, revertitur. Dehinc rogatu Adriani pape Italiam ingreditur,
et Desiderium Longobardorum regem Ticini obsidione inclusit. Ibique dimisso exercitu, Romam orationis gratia pergit. Inde reversus, urbem [Papiam] fatigatam ad deditionem compulit regemque captivum abduxit [cum
uxore et filia]. Inter hec Saxones, absentia regis elati, fide postposita, contigua terre sue loca depopulantur. Porro
rex, subacta Italia, reversus in Franciam, tripertito ordine militum Saxoniam ingreditur, incendiisque vastata terra, predam
immensam diripuit, et non multo post regressus, denuo ab eis obsides accepit. His diebus Constantinus persecutor 35.
imperii sui anno mortuus est, eique filius suus Leo successit, et Grecorum monarchiam per sex annos satis
debiliter tenuit in Grecia.
2. De Leone imperatore Grecorum, et cronica ipsius temporis.
Anno [igitur] ab incarnatione Domini 776, Leo, 66. ab Augusto, imperium Grecorum accepit. Hic primo
visus est mitior; unde et principes filium eius imperatorem postulant. Per idem tempus Saxones, more suo non semel,
set sepe pactum mentientes, Karolus diversis preliis pressit, ac plurimis ex eis fidem christianam accipere persuasit. Porro
Leo imperator 5. imperii sui anno moritur.
Cetera versifice gesta referre placet.
3. Item de Pipino et de generatione ipsius versifice narramus, et quomodo Karolus
vocatus est in auxilium Romane ecclesie in Ytaliam.
Pipinus moritur, consurgit Karolus acer,
Natus in Ingeleheim, cui Berta fit Ungara mater
Pipinusque pater: cronica vera patent.
Dupla fuit iuveni mensura pusilla parentis,
Maior erat probitas, species, audacia mentis,
Fama fuit celebris, gloria multa nimis.
Nunc moritur Stephanus memoratus papa secundus,
Annis quinque suo viguit sub docmate mundus,
Insuper in finem pertulit octo dies.
Tertius accedit Stephanus Rome venerandus, Quem Desiderius perturbat ubique tirannus,
Temporis exigui vir modo papa fuit.
P. 209 v. 36 post nimis addit A:] Uxor ei Desiderii fit filia regis,
Quam cito desprevit, patrem quoque marte subegit,
Sicut in hiis titulis cronica scripta legis.
Quae postea delevit B1.]
|
|