49

A.D. MCLXX, indictione secunda, VI kal. Iulii. Miserunt Pisani Consules Gerardum
Cortevekie Consulem legatum ad Regem Sicilie in una galea cum duobus sapientibus, scilicet
Gerardo Barattule et Guidone Galli pro pace facienda: quos Rex Sicilie cum honore
magno recepit, et pacem honorifice cum eis perpetuo firmavit.
A.D. MCLXXI, indictione III. Pisani consules miserunt Caronem Consulem et socium
cum una galea legatum in Sardineam, pro concordia facienda cum iudicibus et Sardis, cum
duobus sapientibus, Turchiarello legis doctore, et Guidone Barbette. Qui cum devenissent
ad Plumbinum, videntes unam galeam Ianuensium ducentem navem Pisanorum quem ceperant,
in eam viriliter pro eorum nave defendenda et pro bello cum eo faciendo, impetum
fecerunt. Ianuenses vero, cum alias duas galeas ad insidias cause posuissent, predictam Consulis
galeam usque ad Ilbam infugaverunt, eamque ibi tertio kal. Iunii cum predicto Consule
et Turchiarello et Tomasio quondam Uberti Sigerii et aliis, ceperunt.
A.D. MCLXXI, Bulgarinus Anffossi et Morellus Guido Fornarii et Ugo Laggii cum
IIIIor galeis super Ianuenses in Sardineam navigaverunt et decem Ianuensium naves ceperunt,
de quibus V naves vigilia Sancti Iohannis Baptiste igne cremaverunt, et alias V mercibus
honeratas Pisas duxerunt.
A.D. MCLXXI, ind. III. A temporibus Dathan et Abiron, et Sodome et Gomorre, non
fuerunt tam miranda et stupenda prodigia, qualia evenerunt in terra Ierosolimitana. Civitas
Tripuli, cum magna ecclesia dedicata ad honorem Beate Virginis Marie, cum toto populo;