Astensis Poeta: Novus Avianus

Pag 124


Pandere res gestas cum sit tibi, Musa, potestas,
pluribus ignotum notificato iocum.
Nota placet multis, incognita fabula nullis;
dic: cur ergo taces, cum recitando places?
Notificata nitet, non agnita fabula vilet,
dic igitur nobis facta iocosa Iovis.
Iuppiter ad ludum matres clamavit in unum;
ut plebs convenit, talia verba dedit:
'si quaevis matrum meliorem det mihi natum,
sit pincerna deum, mundus adoret eum.'
Cum Iove di ludunt; matres sua pignora ducunt:
quaeque cupit proli posse placere Iovi.
Mendas occultant, in pulchrum turpia mutant,
pignora dumque colunt, posse placere volunt.
Ut facies vertant, matres medicamine certant;
cui bona forma fuit, se magis ante tulit.
Ornant infantes: timor et spes urguet amantes;
sperant atque timent, dum Iovis ora vident.
Turpis adornatur, formosior ut videatur;
dona Iovis sperat, qui speciosus erat.
Ad Iovias voces ducunt animalia proles,
nullum dando sonum stant Iovis ante thronum.
Plebe fuit muta sic simia voce locuta:
'huic promissa dabis, rex bone, si qua sapis;'
et tetigit prolem: 'huic debes' inquit 'honorem:
iuro tibi decies, te decet haec species.
Si qua valet matrum natum vocitare beatum
per formale decus, praevalet iste meus.'

1



5




10




15




20




25


Torna all'inizio