Paulinus Aquileiensis: Carmina

Pag 164


5. Illo dignare, quaesumus, imperio
mandare uentis, imperare nubibus,
quo dudum nostra de parte cum carperes
in naui somnum dignatus es surgere
tunc exoratus tuis a discipulis.
6. Dixisti mari: “Tace!” Mox conticuit.
Ventos iussisti prorsus obmutescere,
in se refudit mare fluctus tumidos,
procella uenti dissipata siluit,
est facta magna quapropter tranquillitas.
7. Beatae modo genetricis uirginis
Mariae, sancti Michael et Gabriel,
Iohannis, Petri Paulique nos precibus
apostolorum, deprecatu adiuua
patriarcharum, prophetarum, martyrum.
8a. Dic Austro, flatu tranquillo per aera
collecto spiret lente, dic et Africo,
effundant imbrem de nube serotinum
benedicente tua sancta dextera,
terram fecundent oportuno tempore.
8b. Dic Austro, flatu tranquillo per aera
collecto spiret lente, dic et Africo,
fugata nube, resoluta nebula,
cessent effusas irrorare pluuias,
terram fovere solis iube radio.
9. Turbo, procella, tempestas tonitruum,
igneus aether coruscante lampade
tuo iubente mitescant imperio.
Flagellum, digne quod meremur, grandinis
sola suspende miseratus gratia.

Torna all'inizio