LXXXIV.
De ordine naturali et artificiali .
Cum autem auri nitor vel metallorum fulgor per se tamquam
insufficiens ad operis venustatem docti requirat artificis
peritia decorari, premisso regularum documento, stilum ad
artificialem ordinem convertamus. Unde nota quod in constructione
duplex est ordo, scilicet naturalis et artificialis. Naturalis
est ille qui pertinet ad expositionem, quando nominativus
cum determinatione sua precedit, et verbum sequitur
cum sua, ut «ego amo te». Artificialis ordo est illa compositio
que pertinet ad dictationem, quando partes pulcrius disponuntur;
qui sic a Tullio diffinitur: «Compositio artificialis
est constructio dictionum equabiliter perpolita».
|
|