3. Mortis nuncium per stultam mulierem
a paradyso suscepit mundus olim,
dignum fuit, ut per bonam mulierem
a sepulcro uitam mundus obaudiret.
De sepulcro surrexit pastor bonus.
4. Mors in orbem introiuit sub peccato,
quod commisit primus homo per mandatum,
et ab illo usque Christum perdurauit,
qui per crucem uitam mundi reuocauit.
De sepulcro resurrexit pastor bonus.
5. Adam uetitum cum lignum usurparet,
mortem nobis propinauit. Sed dum lignum
Christus crucis contrectauit, uitam nobis
in perpetuo firmauit et donauit.
De sepulcro resurrexit pastor bonus.
6. Serpens callidus gularum fraude primum
in paradyso decepit protoplaustum,
Christus patri obediuit usque ad mortem
et cum <morte> triumphauit sic serpentem.
De sepulcro resurrexit pastor bonus.
7. Nam regnauit mors ab Adam et in eos,
quos non propria peccata polluerunt,
sed sub uinculo delicti protoplausti
descendebant ad infernum et electi.
De sepulcro resurrexit pastor bonus.
8. Christus passus est pro nobis et auctorem
mortis sua morte uicit et deleuit
mox cirographum peccati, quod infelix
homo tulit a serpente, cum cecidit.
De sepulcro resurrexit pastor bonus.
|
|