Ad potestatem: tui vel tua dominatio, maiestas, potestas, preminentia,
sublimitas, precellentia, dignitas. Potest ex horum
etiam altero genitivus fieri in hunc modum: tuę potestatis sublimitas,
tuę dominationis maiestas.
Ad filium vel discipulum: tui vel tua filiatio, dilectio, karitas.
Ad servum: tua fidelitas, tua fidelis subiectio.
Ad religiosas personas: tua sanctitas, pietas, religio, devotio.
Subdevotio ad inferiores personas pertinet.
Ad amicum: tua amicitia, unanimitas, dilectio.
In supplicatione: tua misericordia, clementia, benignitas, suavitas,
meracitas, dulcedo.
In vituperatione: tua nequitia, feritas, crudelitas.
Et sic in omnibus proprietates spectandę sunt.
12. Inveniuntur tantum huiusmodi qualitates pro ipsis qualitatibus
etiam sine rectione genitivorum casuum, ut: nobilitas pro nobiles,
auctoritas pro auctores, sapientia pro sapientes. In huiusmodi
vero rectoribus genitivi casus plura considerantur. Universalis interdum,
ut: fornicationis crimen vel delictum, libidinis vitium, karitatis
virtus, virtutis munus; instrumentum interdum, ut: Iohannis os, vel
labia, vel lingua, libri stilus; interdum sinonima, ut: dilectionis
karitas; interdum quomodo libet iuncta, ut virginitas pudoris, vel
pudor virginitatis; «rubor verecundie», vel verecundia
ruboris; interdum situs, ut: «prerupta montium»,
«concava vallium», «intima
medullarum» vel cordis; interdum similitudo
vel metaphora, ut: luce vel sole sapientię fulgeo; «amoris facibus
inardesco».
13. Per mutationes verbi in omnes casus nominis qualitatis
sue venusta plerumque fit eloquutio his modis.
"Cremo": crematio a me agitur, vel fit, vel est; cremationem
sum agens, vel faciens; cremationi insisto, immineo, insto, incumbo,
insudo, invigilo, vaco, indulgeo, studeo, studium prebeo,
diligentiam adhibeo, me exhibeo; cremationem ago vel facio; crematione
non vaco.
|
|