Ne tibi confidas, ipso iurante frequenter,
Quod petis ut faciat: non sacramenta timet;
Arbor iniqua bonos nescit producere fructus,
Numquam villanus novit habere fidem.
Si de stirpe bona predicta sit edita Polla,
Nuda licet veniat, sit michi nupta placet".
"Iuste nemo tuum posset reprehendere verbum,
Omnes scripture testificantur ita.
Sed tamen in mundo quin fallat regula non est,
Aspicitur pungens spina creare rosas.
Degenerat quandoque Deo natura volente,
Ut sint in cunctis facta stupenda Dei;
De patre sepe bono soboles descendit iniqua,
Et bona progenies de genitore malo.
Non attendatur carnis, sed mentis origo:
Ex animo potius nobilitatur homo.
Natus ab arce poli venias: dum sis sine mente,
Iam tua nobilitas est reputata nichil;
Econtra, sit natus homo de fece lutoque:
Preditus ingenio, nobilitate nitet.
|
|