ad audientiam nostram sedulo clamore
pervenit, quod in decreta tibi provincia juris
ordine non servato, et timore nostrae Majestatis
abjecto, excessus perpetrantur illiciti,
et transgressionum insolentiae assiduae committuntur,
status regni pacifici dulcedine lacessita.
Estne istud de laude providi praesidis? quod
nunc provincia cui praeficeris praedicat, quod
stratae violantur et praedia, homines occiduntur,
committuntur et furta, moventur rixae,
excitantur et jurgia, die noctuque perpetrantur
enormia, feruntur et arma, nec
per te plectuntur exinde transgressores imo,
ut auribus nostris innotuit, cum ad te deferuntur
scelerum patratores, hujusmodi reservantur,
et qui personali supplicio sunt plectendi, pecuniario
apud te interveniente suffragio a poena
pro commissis sceleribus debita liberantur. Ad
quorum exemplar alii elationis spiritum sumentes,
in viros justos desaeviunt, et pacificos
indesinenter offendunt; dum impunes transire respiciunt,
quos ad personalem poenam juris sanctio
merito condemnaret. Certe si honorem
tuum attenderes, si beneplacitum nostrum observares,
procederes solertius in praedictis, et
in commisso tibi regimine accuratius vigilares;
attendendo, quicquid inde laudis tibi acquiritur,
quod praemium a dextera nostrae Majestatis
expectas? cum te incrassante, in civitate
qualibet jurisdictionis tuae, ubi viget fertilitas
et victualium copia affluenter exuberat, per
partes alias jurisdictionis ejusdem scelerum nequitia