2. DE LITTERA
1 Littera uero est minima pars composite uocis, uel uox que scribi
potest indiuidua. 2 Dicitur autem littera uel quasi "legittera",
eo quod legendi iter prebeat, uel a "litturis", quia in tabulis delebantur.
3 Littera est proprie nota elementi et uelut imago uocis,
elementa uero ipse pronuntiationes; alterum tamen pro altero
abusiue ponitur. 4 Sunt igitur figure litterarum quibus nos utimur
XXIII, earum uero pronuntiationes multo ampliores. 5 Accidit
igitur littere nomen, figure, potestas. 6 Nomen ut a, b, c,
que sunt indeclinabilia omnia. 7 Figure uero sunt quas uidemus
in singulis litteris. 8 Potestas autem ipsa pronuntiatio et uis ipsius
elementi, propter quam et figure et nomina facta sunt. 9 Secundum
harum itaque potestatem, de IV rebus in orthographia
tractari solet, id est de diuersitate litterarum, de aspiratione, de
mutatione, de ordine.
|
|