debitum, ad commoda quaelibet applicanda
benevoli, etc. nuncios tuos viros providos
et solennes, ex parte tui et Senatus populique
Romani, nuper ad nostram praesentiam
destinatos, gratanter recepimus. Qui dum
suae legationis officium sollicite, diligenter
et provide coram nostrae Serenitatis aspectibus
implevissent, ecce super capitulis
omnibus, quae ipsorum relatio patefacta continuit,
expediti, gratiose per vos ad
propria remittuntur. Cumque tam nuncii
quam caetera, quae ex parte tua et Romanorum
omnium, nobis successu temporis offerentur,
tanquam eorum negotia, quae propria gerimus,
gratissima sensibus nostris accidant:
circumspectionem tuam, de qua toto
corde confidimus, requirimus et hortamur
attente, quatenus firmam fabricans in nostrae
Magnificentiae liberalitate fiduciam, sic strenuos
actus erga honorem nostrum prudenter
accommodes, sic industriae laudabile principium,
laudabilioribus continuationis semper
in antea processibus prosequaris, ut sollicitudinis
opera, tanti actoris fulta suffragio,
erga te et tuos, amplissimae dexteram
nostrae liberalitatis invitet.