Inde pluunt lapides de verticis arcea rotati;
Pila, sagitta cadunt; veniunt mortalia fati.
Conclusos equites rustica turba tenet.
Vulnera suscipiunt; mors undique prona paratur,
Arma vacant equitum, pugne locus inde negatur.
Pervia comperiunt; fit rediviva salus.
Passibus occultis patet hinc ascensio regi.
Rupibus Alpinis iter hoc ad summa peregit.
Rustica turba perit, que mala nostra gerit.
Que cupit imperium totum simul illaqueari,
Cogitur ex alto plebs vertice precipitari.
Quotquot precipitant, fluminis unda trahit.
Nec satis est illos unda vel rupe gravari,
Set pede truncari vel funditus exoculari;
Non vult dampnari singula sorte pari.
Imperat ingenuos meliori lege necari,
Quos facit excelsa furca super astra levari:
Talis honor reprobis debet ob ista dari.
Haec recipit dona pro traditione Verona.
Nunc tuba magna sonat, procedit abinde corona;
Regia signa volant; pax datur inde bona.
Valle Tridentina nichil impedit ulla ruina.
Brixia festinat Bozanica tradere vina,
Gensque subalpina prebet ubique viam.
Hic vada dat Lichus; Germanica rura capescunt
Prelia compescunt; iocus ingruit; arma quiescunt,
Et repetit patrie gaudia quisque sue.
10. De initio discordie inter papam Adrianum et imperatorem F.
Cesar ut in patriam vexilla retorsit ab Urbe,
Grandis et orribilis discordia crevit in orbe;
Pax perit aecclesiae; scismatis error adest.
Federe connexus fuerat cum cesare papa:
Si foret interdum pars altera fortet gravata,
Altera subveniat: stent ea pacta rata.
Absque pari voto cui consensisset uterque,
Nullum pacis opus Grecis pars altera prestet;
Sic neque cum Siculis pax agitanda fuit.
Federe corrupto, quo fertur papa teneri,
Migrat in Apuliam; vult cesaris hostis haberi.
Pactio nostra perit, Grecus amicus erit .
Hostibus imperii presul Romanus adhesit;
Federa dat Siculis, pariter dat federa Grecis:
Fit modo materies mortis et hora necis.
11. De discordia et divisione omnium cardinalium, ubi pars erat cum papa, pars erat cum
imperatore.
Scinditur aecclesia: pars altera pacta recusat,
Munera despiciunt, et federa Greca refutat;
Cesaris auxilia pars retinere putat.
Hac in parte manus misit prior Octavianus,
Guidoque Cremanus, vir nobilis et veterannus,
Et reliqui secum scismata longa petunt.
|
|