sibi tribuentium, ut liberum arbitrium sibi putarent
posse sufficere ad justitiam.
29. AMBROS. Propter transgressiones . Superbienti
populo lex posita est, ut quoniam gratiam charitatis
nisi humiliatus accipere non posset, transgressione
humiliaretur, ut quaereret gratiam.
30. LANFR. Donec veniret semen cui . Deus Pater
haereditatem totius mundi promiserat Christo, sicut
in psalmo: Postula a me, et dabo tibi gentes , etc.
31. AUGUST. ( Expos. Epist. ad. Galat. , cap. III,
tom. IV.) Semen cui promisit . Semen cui promissum
est populum significat credentium.
32. AMBROS. Mediator autem . Si Filius Dei naturali
aequalitate manere vellet, ne se exinaniret formam
servi accipiens, non esset Mediator Dei et hominum;
quia ipsa Trinitas unus est Deus. Sic itaque unicus
Filius Dei Mediator Dei et hominum factus est, cum
Verbum Dei Deus apud Deum et majestatem suam
usque ad humanam deposuit, et humilitatem humanam
usque ad divinam subvexit ut Mediator inter
Deum et homines homo.
33. LANFR. Deus autem unus est . Quia Christum
dixit [ sup. , Mediatorem] Dei videlicet et nominum,
et Christus est, videbantur esse duo dii, sed absit!
Unus enim Deus, Pater, et Filius, et Spiritus sanctus.
34. Lex ergo adversus promissa Dei . Item, probat
quod lex non dat haereditatem, vel promissionem,
vel benedictionem; nam si lex daret, promissio, id
est fides, non daret; sed promissio tantum dedit
Abrahae haereditatem. Ergo lex non dat haereditatem,
quod est, lex ergo adversus promissa Dei?
35. AUGUST. Lex ergo adversus . Replicat ipsam
quaestionem.
36. LANFR. Si enim data esset lex . Item probat.
Lex non dat haereditatem, quia non dat vitam, quia
si lex daret vitam, daret et justitiam (a pari), sed
non dat justitiam, quia omnia sunt sub peccato
apud Judaeos, quia Scriptura dicit: Ergo lex non
dat justitiam (a relatione). Ergo nec vitam (a pari)
Ergo nec haereditatem dat lex. Ergo per fidem tantum
datur haereditas, vel promissio, vel benedictio,
vel vita; omnibus his etenim utitur ut paribus.
|
|