16. His diebus declinante iam vere mensis unius spacio
dirum sparsere iubar, ardentes in celo comete, frequentes
quoque terre motus mundo fuere, adeo, ut die ipso
resurrectionis dominice bis fieret, mane scilicet et vespere.
17. Preerat tunc temporis Rome Alexander apostolicus ex
Mediolanensis clero ecclesie Lucensis primo factus episcopus.
Cumque satis foret ydoneus, apostolicam deinde promeruit
dignitatem, Alexander de Anselmo vocatus. Huic
statim surrexit adversarius Cadalous Parmensis episcopus
institutione regis ac matris auguste papa nuncupatus. Qui
hostiliter Romam adiit post multam interfectorum stragem
usque ad muros urbis Alexandri prosecutus exercitum.
|
|