38. Iuxta Scolam Graecam palatium Lentuli. Ad Gradellas
templum Solis. Ubi est Sanctus Stephanus rotundus, fuit templum
Fauni. In Elephanto templum Sibillae, et templum Ciceronis ubi
nunc est domus filiorum Petri Leonis. Ibi est carcer Tullianus,
ubi est ecclesia Sancti Nicholai. Ibi iuxta templum Iovis, ubi fuit
pergula aurea. Ad Sanctum Angelum templum Severianum. Ad
Velum Aureum templum Minervae. In ponte Iudaeorum templum
Fauni. Ad Sanctum Stephanum in Piscina palatium Cromatii praefecti,
et templum quod dicebatur Olovitreum, totum factum de
cristallo et auro per artem mechanicam, ubi erat astronomia cum
omnibus signis caeli, quod destruxit sanctus Sebastianus cum Tiburtio,
filio Cromatii.
|
|