Dulichię, duplices non doctę Pallados artes:
ingenium, textura et acus, quo cedat Aracne,
quanvis haec tenui mentitur nubila filo,
non pudor ingenuus, non simplex gratia morum,
non castigatum confessa modestia pectus
nec valuere trucis naturę munera cymbam
exorare senis vel certam flectere mortem.
quaenam sedulitas, quaenam tibi cura medentum
defuit aut succi diverso ex orbe petiti?
quę delubra deum, quaenam sine thuribus aedes,
quis sine honore lapis vel quę penetralia templi
igne carent Cilico? non vir genialia tantum
sacra, sed externos properat placare Penates.
quaeritur antiquis sacrorum annalibus ordo,
et cadit ante Iovem gramen depasta Faliscum
hostia et auratis tepefecit cornibus aram.
at tibi bis septem mactantur, Iuno, iuvencę
numine pro triplici. iam rursus grata Dianę
instaurata novum cognovit Aricia regem,
atque iterum puero renovantur pręside lustra,
Amphitryoniades, et Surrentina Dicarchum
villa tuens priscis miratur gymnada festis.
quin etiam Aeneę nocturna piacula divę
|
75
80
85
90
95
|