translatione verba utuntur. (6) Et dicitur iste color antimetabole.
32. (1) PERMISSIO.
(2) Permissio est causa misericordie captande alicuius rei in
alterius potestatem per verba concessiva traditio, (3) ut si dicam:
'De me rebusque meis omnibus agite quicquid vultis, quia
iussioni vestre parere in omnibus sum paratus'. (4) Et vocatur
iste color epicarope.
33. (1) DUBITATIO.
(2) Dubitatio est cum querere videtur orator utrum de duobus
potius aut quid de pluribus potissimum dicat, (3) hoc modo:
'Obfuit isti monasterio multum sui abbatis sive malitiam sive
stultitiam dici oportet sive utrumque'. (4) Item: 'Tu ausus fuisti
Christum prodere, o Iuda, omnium mortalium. . . Quero quonam
te digno tuis <moribus> possim nomine appellare'. (5) Iste color
vocatur aperiodos.
34. (1) EXPEDITIO.
(2) Expeditio est cum, multis rationibus enumeratis, quibus
aliqua res fieri potuerit aut non fieri, cetere tolluntur, illa sola