16
M. Ferrariensium consulibus prudenti bus et totius civitatis populo, Tervesini consules et eiusdem loci universitas salutem et indissolubile dilectionis vinculum. – Proborum laudabilis est consuetudo virorum inter quos dilectio precipua habetur, pacem et amorem tenere ac idoneis exhibitionibus ad se invicem fomenta prebere. Noveritis igitur in itinere Ravenne aliquot e vestris civibus quendam nostrum Ubertum nomine cepisse iproque optime verberato centum argenti marcas abstulisse. Quamobrem per federa nos et vos coniungentia et per treugas iureiurando confirmatas vestram prudentiam plurimum precamur, quatinus nostro civi predicto sua integre restituatis et iniuriam iuxta legis rigorem puniatis ut nullo tempore similia recipere valeatis.
17
R. Viris honestissimis Tervisinis consulibus et cuncto populo, Ferrariensium rectores et eiusdem loci habitatores salute et perpetue dilectionis constantiam. – Indecens et omni rationi contrarium fore videtur si unius vel paucorum noxa plurimum comoditas pessumdaretur et si quod parvo potest restitui maximarum discordiarum esset initium. Quamobrem vestre prudentie sit cognitum, ex quo vestris civis negotium scivimus, illico sua prout nobis scripsistis, reddere aut ei ex iniuria decus iuxta legum precepta fieri mandavimus. Vestre itaque benignitatis dulcedinem exoramus quatinus pacem et treugam inter nos stabilitam illesam teneatis et si alicui nostrorum civium aliquod tale vestrum infra districtum evenerit, velud speramus, equa erga eum lance habeatis.
|
|