Incipit Breuis doctrina dictaminis a magistro Ventura de Pergamo tradita.
Quoniam introducenti breuia propter memorie debilitatem, facil[l]ia
propter ingenii rudium paruam capacitatem, utilia propter ad altiorem
ascendendum citius facultatem competere non ignoro, idcirco que michi
necessaria uisa sunt arti epistolaris dictaminis in hoc redegi uerbis compendiosis
opusculum, quod in duas diuiditur particulas principales. In quarum
prima determinatur de hijs que ad integritatem ipsius epistolaris
dictaminis exiguntur. In secunda terminatur (tam) de uitijs ab omni specie
dictaminis euitandis quam de uirtutibus inserendis.
Incipiunt rubrice prime parti.
Qvot modis facultas habetur dictaminis et discitur. Quid dictamen et
quot modis fiat. Quid epistola. Quot sint partes epistole. Quid salutatio.
Notabilia circa salutationem. Quid exordium. Notabilia circa exordium.
Quid naratio. Notabilia circa nar(r)ationem. Quid petitio. Notabilia circa
petitionem. Quid conclusio. Notabilia circa conclusionem.
Quomodo partes epistole habeantur, et quot modi discantur.
Facultas dictaminis habetur a tribus : ingenio, usu et eruditione. Primum
parit natura, secundum prestat industria, tertium dat doctrina. Discitur
autem tribus modis: arte, exercitatione et imitatione. Unde quidam:
Rem tria perficiunt: ars cuius lege regaris,
Vsus quem serues, meliores quos imiteris.
Ars certos, usus promptos, imitatio reddit
Artifices aptos, tria concurentia summos.
|
|