XXVII.
De episcopo et toto clero ad papam pro licentia
super adiutorio quod petunt laici in guerra positi.
Sanctissimo patri et domino, Gregorio Dei gratia
summo pontifici, Henricus miseratione divina episcopus, B.
archidiaconus, C. archipresbyter, totum capitulum, abbates,
priores, prepositi, cappellani, et clerus civitatis et dioceseos
Bononie universus pedum oscula beatorum. Beatitudini
vestre insinuare constringimur, quod sedula petitio non
desinit iterare, ut super iis que de novo emergunt novum
consilium habeamus. Instant quidem potestas et commune Bononie
iugiter precibus et exhortationibus importunis, ut eis in
multis necessitatibus positis, propter guerram et maxime pro
circla civitatis que ad defensionem facta noscitur singulorum,
aliquam sicut decet compassionem habentes, subvenire
misericorditer dignaremur, impendentes adiutorium intuitu
pietatis, non pro collecta, necessitate, vel debito, sed loco benedictionis
et gratie specialis. Unde non immerito hec reducentes
ad vestre clementie notionem, sine cuius mandato non
debent huiusmodi res attentari, paternitati vestre affectione
multiplici supplicamus, ut nobis dare dignemini licentiam
laudabilem et benignam, predictis in tanto articulo constitutis
grata conferendi subsidia caritatis. Nam speciali cum
iis est agendum clementia, quos causa fovet laudabilis et
honesta.
XXVIII.
Responsiva domini pape ad beneplacitum
pro adiutorio laicis in necessitate dando.
Quamvis ecclesia, sponsa Christi, et mater fidelium et
magistra, laicis respondere nos debeat serviens cum tributo,
|
|