est actiuus, per -bile est receptiuus, et -are est actus, existens intra
-tiuos et -biles. Per tertiam speciem est dicendum, quod angelus
est Dei. Et haec de angelis sufficiant causa breuitatis.
11.3. DE QVAESTIONIBVS TERTII SVBIECTI QVOD EST CAELVM
73. Vtrum caelum moueat se ipsum? Et respondendum est
quod sic, ut sua principia habeant correlatiuos substantiales et
proprios per suas constellationes.
74. Vtrum caelum moueat se ad locum? Et respondendum est,
quod sic, in se et in inferioribus circulariter, sed non extra se.
Ratio huius est, quia extra se nullam actionem habet uel habere
potest.
75. Vtrum angelus moueat caelum? Et respondendum est, quod
non; quia si moueret, iam -tiui suorum correlatiuorum essent
inferius, et -biles superius; et etiam per suam formam iam non
moueret elementa nec elementata, sed per suam materiam; quod
est impossibile.
76. Quaeritur: Vtrum caelum habeat animam motiuam? Et
respondendum est, quod sic. Nam aliter sensitiua et uegetatiua
non haberent animas motiuas, nec elementa haberent motum.
77. Quaeritur per primam speciem regulae de E: Quare est
caelum? Et dicendum est, quod ex eo, quia ex sua forma et
materia est constitutum.
78. Per secundam speciem regulae E quaeritur: Caelum quare
est? Et respondendum est, ut entia inferiora possint habere
motum. Et haec de caelo sufficiant causa breuitatis.
11.4. DE QVAESTIONIBVS QVARTI SVBIECTI. QVOD EST HOMO
79. Quaeritur: Vtrum homo de Deo possit habere maiorem
notitiam affirmando aut negando? Et respondendum est, quod
affirmando. Deus enim non est per illa, sine quibus ipse est, sed per
illa, sine quibus esse non potest.
|
|