1. In nomine Domini dicam, vos audite,
Vestro bono proferam <vobis> quicquid scite;
Primo detis veniam lingue non polite,
Gerarde cum sotiis, doctor redimite.
2. Duo vobis referam pro vestri honore:
Primo de Ambrosio loquar pre dolore,
De vestro dulcissimo defuncto pastore,
Et secundo breviter de novo doctore.
3. Mea tristis anima est usque ad mortem,
Orphanam Ambrosi videns hanc cohortem:
Dolorosam ideo, heu, heu, tristem sortem!
Omnis mende nocuit mors virum exortem.
4. Modo est Bononia bona viduata,
Patrono grammatice tota minorata:
Totus mundus conqueri potest cur orbata,
Et cur est Ambrosio vita iam sublata.
5.Tedet meam animam modo mee vite,
In amaritudine loquar, nec florite:
O vos, omnes homines, auditum venite,
Quid mors nobis triverit, <dicam nunc>, audite.