duplici perfidiae ruga frons inpudica fodiatur, quatenus unius
lapidis percussus ictu intereat, qui unitatem fidei scindere nititur
et unum dominum Iesum Christum in duos filios uel duos deos
scismatico carpere molitur adnisu, ac per hoc proprii truncatus ensis
mucrone, dauitica modo mirabili se secante manu, iam ulterius
nullomodo ualeat reuiuisci. Quod si fabuloso ydrarum more,
trisulcibus ferro desectis capitibus, numerosius rursus sibilantia
resumpsisse colla portentuoso monstro ludificat, ac per hoc ex
damni quasi rediuiuo detrimento commodius sese proficisse iactatur,
diuinus et idcirco inextinguibili flamma ignis adhibeatur succensus,
quatenus rebellium ambustae uenulae medullarum, nullam
deinceps ueneni inficientis suffusione parturiendi prodigiosa
prolis obtineat facultatem.
I 8 (I 8) Sed quoniam ueritatis adsertores omnimoda circumspectione
mendacii uitare muscipulam nihilominus debent, testimonium
idcirco illi perhibeo, quia plerumque satis bene sanoque
sensu professionis uidetur seriem non multum degeneri calamo
promulgare. Illud pro certo uideri non dubium est, quoniam,
quamdiu praecedentium patrum uestigia sequitur ac tritam eorum
rectae fidei gressibus uiam scandere non diuertit, conposito incedere
dinoscitur gradu. At ubi ad suum audacter sensum recurrit,
continuo deuius per anfracta labentium rupium, offusis concite
densissimis ignorantiae tenebris, euagare prospicitur, ac per hoc
modo dentatis falsitatum inpingit in scopulis, modo abruptis uesaniae
uersari prospicitur praecipitiis, modo Arrium obuium amplectitur,
modo praeuium Nestorium gressu subsequitur errabundo.
Statimque dare operam nititur, ut distruantur peruerso conamine
ea quae paulo ante edificasse praeconabatur laborioso certamine.
Qua de re, in quantum ad praesens datur intellegi, super labentium
glarearum glumas, non super firmam petram fundamentum posuisse
conuincitur. Vnde inundantibus pluuiis uentisque inpellentibus
inlisum pendulum aedificium ruit. Enim uero putabat se uasa
cantici habere sicut Dauid, et idcirco salomonica auro radiantia
|
|