turbationis et turbinis deliramenta sedanda, vellem libenter et cuperem
illius vobis consiliaris discretionis posse remedio subvenire, que, pulsis
causis et casibus passionum huiusmodi, nutrimenta vobis in anima consolationis
et pacis insereret et stabiliret in quietis dulcedine vitam vestram.
De penuria igitur mea recipientes, si placet, in consolationis eventum,
cum patientia, que scribuntur, rogo et supplico, petita de presumptione
venia, persuadens, quatinus, divine legis in primos parentes nostros, qua
mortis in eos, si terminos Eius excederent, celestis pretorii Iudex ipse
iustissimus sententiam promulgavit, que penam ipsorum, post culpam
commissam, in totam propaginem humane posteritatis extendit, ordinem
advertatis; et considerantes quod ab huiusmodi sententia, que iam per
tempora et etates in rem transiit iudicatam, a quoquam cuiusvis eminentie
conditionis aut status appellari non possit, nec ipsius vel suspendi finalis
effectus, vel in toto, seu parte, maioris auctore iudicis retractari, cum
nec etiam Iudex ipse filium suum, pro redemptione humani generis incarnatum,
ab observatione legis huius exemerit, quin – ut tam ipsi quam
aliis, omnis carnis pusillis et magnis, equa esset ista penalitas – debitum
humane fragilitatis exolveret, genas lacrimis lintheo consolationis abstergite
et in eius virtute fortitudinis spiritum, de tam gravi casus acerbitate,
suscipite, qui aufert spiritum principum et, cum vult, omnis carnis figmenta
dissolvit. Illam vero de salute fratris eiusdem spem assumatis in
Domino, ut eius anima, post vite presentis exilium, quam plenus ipse dierum
in sancta monastice religionis observantia, in pontificalis officii executione
laudabili, in exhibitione iusta iustitie, in sanctarum orationum
iugi perseverantia, in elemosinarum erogatione largiflua, in ecclesiasticorum
sacramentorum receptione purissima et catholice fidei confessione firmissima
consumavit, ad sanctorum pontificum insigne consortium transmigravit,
visionis Eius participio fruitura, qui vita vivens est in se credentium
et resurrectio glorifica mortuorum.
|
|