Gregorius II papa: Epistolae

Pag 258


GREGORIUS SERVUS SERVORUM DEI BONIFATIO RELEGIOSO
PRESBITERO.
Exigit manifestata nobis relegiosi propositi tui pie in Christo flagrantis intentio
et adprobata sincerissima fidei tuae perlata relatio, ut ad dispensationem verbi divini,
cuius per gratiam Dei curam gerimus, te conministro utamur. Experientes proinde,
te ab infantia sacras litteras didicisse profectusque indolem ad augmentum crediti
caelitus talenti prospectu divini amoris extendere, videlicet gratiam cognitionis caelestis
oraculi in laborem salutiferae praedicationis – ad innotescendum gentibus incredulis
mysterium fidei – instanti conatu expendere, conlaetamur fidei tuae et adiutores
effici cupimus gratiae praerogatae. Idcirco, quia praemissi conatus pium
affectum usque ad apostolicae sedis modesta praevisione perduxisti consultum – ut,
membrum ex membro, proprii corporis caput requirens, motum mentis probares,
capitisque arbitrio humiliter te submittens, eius directioni iusto tramite properans,
solidati conpaginis plenitudo exsistas – ideo in nomine indivisibilis trinitatis per inconcussam
auctoritatem beati Petri apostolorum principis, cuius doctrinae magisteriis
dispensatione fungimur et locum sacrae sedis amministramus, modestiam tuae relegionis
instituimus atque praecipimus, ut in verbo gratiae Dei – quo igne salutifero,
quem mittere Dominus venit in terram, enitere videris – ad gentes quascumque
infidelitatis errore detentas properare Deo comitante potueris, ministerium regni Dei
per insinuationem nominis Christi domini dei nostri veritatis suasione designes et per
spiritum virtutis et dilectionis ac sobrietatis praedicationem utriusque testamenti mentibus
indoctis consona ratione transfundas. Disciplinam denique sacramenti, quam ad
initiandos Deo praevio credituros tenere studeas, ex formula officiorum sanctae nostrae
apostolicae sedis – instructionis tuae gratia, praelibata – volumus ut intendas.
Quod vero actioni susceptae tibi deesse perspexeris, nobis, ut valueris, intimare curabis.
Bene vale.
Data Id. Maii, imperante domno piissimo augusto Leone a Deo coronato magno
Imperatore anno tertio, post consulatum eius anno tertio, indictione secunda.

Torna all'inizio