Incipiunt Regule Ortographie per alphabetum compilate
1.Circa ortographie doctrinam intenti primo scire debemus quid sit ortographia et unde dicatur, et quia ipsa consistit in cognitione literarum et sillabarum, videndum est de ipsis. Sed primo quid sit litera, quod sillaba, et unde dicatur: Ortographia est ordinationis rectitudo literarum et in sillabis secundum vim et potestatem ipsarum.
Et dicitur ab ortos, quod est rectum, et graphia, quod est scriptura, modo ortographia, id est recta scriptura.
2. Litera est minima pars composite vocis, id est constructionis et hoc quantum ad distinctionem orationis per vocem et non per significatum, vel sic diffinitur: litera est vox individua que scribi potest; quarum diffinitionum prima datur in relatione ad suum totum, quod est oratio, secunda in comparatione ad suum genus, quod est vox. 3. Sillabe duplex datur diffinitio; una dicit: sillaba est comprehensio literarum consequens sub uno accentu et uno spiritu prolata. Verum illa diffinitio non est proprie cuiuslibet sillabe cum unaqueque vocalium literarum sillabaque per se facere possit. Unde alia datur diffinitio magis generalis que sic datur: Sillaba est vox literalis que sub uno accentu et uno spiritu indistanter profertur. 4. Litera dicitur a lituris vel quasi litura a lino-nis quia antiqui solebant scribere in tabulis ceratis et postmodum linebant sive faciebant lituras cum digitis supra tabulis causa sciedi quod scripserant, vel dicitur a lego-is quasi prebens iter legendi sive legentibus. Et nota quod hoc nomen litera scribi debet per unum solum /t/ sine /c/ undecumque dicatur, ut Uguccio testatur expresse.
5.Litere accidunt tria: nomen, ut a et b, figura sicut scribitur, et potestas /eo/ quod habet potestatem faciendi dictionem longam vel brevem in accentu.
|
|