LXXXVI.
De subdito ad prelatum.
Reverendissimo in Christo patri, unico refugio, portui
tutissimo, et domino speciali H. Dei gratia Albanensi episcopo
multa sapientia et honestate fulgenti, magister Guido Bononiensis
se totum in omni genere famulandi. Me vestre benignitati
litteris presentibus recommendans, loco muneris et
in signum benevolentie a vestra gratia postulo incessanter, ut
me inter vestros clericos, subditos et fideles dignemini computare,
mee devotioni fiducialiter iniungendo, si vestre dominationi
servire possum in aliquo vel placere.
LXXXVII.
Item alia de subdito ad prelatum.
Vobis qui post solum Deum mihi pater estis, unicus portus
salutis, benefactor et dominus, supplico prout possum, ut solo
divino intuitu et amore mihi manum vestram extendere
dignemini adiutricem.
LXXXVIII.
Item alia de subdito ad prelatum.
Sub vestra tamquam pastoris et domini positus potestate
ad studium ire non debui sine vestra licentia et mandato.
Petens siquidem a vobis veniam de excessu, dominationi vestre,
supplico humiliter et devote, ut pietatis intuitu mihi per biennium
concedatis quod in scholis possim legere ac studere.
|
|