columba, propter sancti spiritus septemplicia donorum carismata
speciosa in sanguine, candidata in lauacro, soror in funiculo caritatis,
proxima in societate adsumptae naturae, suauis in deliciis
scripturarum? Qui sunt isti qui maledictum centenarii pueri nequeunt
effugere, quos tam liberae auctoritatis fiducia indignos
simplicium canum gregis tui socios iudicasti? Quinam sancti gregis
tui sint sacratissimi canes, cuiusdam patrum tuorum, pro quibus
nati sunt tibi filii, contigit nos uaticinio didicisse. Concrepat enim
dauitici carminis huiusmodi decacordo psalterium: Lingua inquit
canum tuorum ex inimicis tuis ab ipso. Visi sunt ingressus tui, deus.
Isti igitur famosissimi canes, qui ingressus dei sunt uisi, pastoris
officium erga caulas ouium non inmerito certum est proculdubio
modo fungi mirabili, qui crudelium beluarum rabiem sanctis, si
dici liceat, procul a mandrilibus gregum cohercere latratibus non
pertimescunt. Qui autem illi sint horum rebellium iuuenum patres,
quos te puduit cum uenerandis canibus gregis tui adsciscere,
adhuc quaerimus, et quaerentibus nobis iam sese pandit aditus
inueniendi. An non antiqui heresaearces horum pestiferorum detrahentium
tibi iuuenum patres extiterant furibundi, Arrius scilicet,
Macedonius, Sabellius, Eunomius, Nestorius, Eutices cum sequacibus
suis, quos fixa rataque katholicae fidei inuectio a consortio
uenerabilium canum tuorum dignis animaduersionibus censuit
alienos? Ipsi haud dubio et ex eorum maledicta progenie isti
propagati sunt filii tenebrarum. Quin potius amici sponsi, qui stat
et audit eum et gaudio gaudet propter uocem sponsi, doceri possumus
quantotius documentis, de qua radice mortiferae damnationis nefandissima
ista proles genus ducat pestiferum: Genimina inquiens
uiperarum quis uobis monstrauit fugere ab ira uentura? Translato
quippe uocabulo parentem et sobolem, alterum in uipera, in
genimine alterum uiperarum uoluit designare, quatenus ex huius
similitudinis formula patenter daretur intellegi de uenenosa ramni
radice spinosae mirice uirgultum prodisse uenificum. Talium fortassis
progenitorum iniquitatem scriptura domini commemorat
usque ad tertiam et quartam generationem in filios retorquendam,
talium utique - nec ambigi ordo permittit ueridicae rationis - qui
per imitationem pestiferam perfidorum patrum filii nuncupantur.
|
|