in manibus regis Nauli, qui propter Palamidis filii sui mortem
capitali odio persequebatur Ulixem. Vlixis igitur sagacitas magna
fuit, per quam a manibus regis Nauli de persona saluus euasit.
Quo uero ingenio uel quo sagacitatis tenui argumento a captura
gentis Aiacis et manibus regis Nauli Vlixes euaserit presens hystoria
non declarat, nisi quod Ulixes ex predictis causis ad Ydumeneum
regem pauper et inops accessit. Rex autem Ydumeneus de
tanta Vlixis paupertate miratus nichilominus hylariter eum suscepit
et casus suos et sue infelicitatis accidencia explorat ab ipso et petit
ea sibi seriatim et particulariter enarrari. Quod Ulixes gratanter
admittens, ut regis peticionem impleret, suorum casuum fata reuoluens
in sui narracione sermonis ea per ordinem explicauit.
De quibus sic dixit: "Uerum est, domine rex, quod post capcionem
Troie, cuius capcionis ego pars infallibiliter magna fui, cum
nauibus meis multis onustis diuiciis de opibus Troyanorum in multa
auri et argenti copia et multorum meorum michi famulantium comitiua
pelago me commisi, et me per plures dies prospere nauigante,
in quendam portum, qui Mirna communiter nuncupatur, primo
saluus applicui, ubi cum meis pro terre recreacione descendi et ibi
tutus per dies aliquos moram traxi, cum ibi nullus michi et meis
molestiam intulisset. Deinde a predicto portu discessi, et aura
michi blandiente secunda, in portum qui dicitur Calastofagos salue
perueni, vbi similiter cum meis per dies aliquos sum moratus.
Cunque fallaces uenti michi tempus prosperum suaderent, a predicto
portu discessi et fere per tres dies proxime subsequentes
feliciter nauigaui. Tunc subito uentorum tempestas inualuit et aer
de sereno factus est repente obscurus incerta nauigacione nunc huc
nunc illuc me sub nimia tempestatis clade uexauit. Demum tempestas
ipsa me compulit in Siciliam diuertere nimis inuitum, ubi
uexaciones sum passus plurimas et labores. Erant enim in Sicilia
duo reges fratres, quorum vnus uocabatur Strigona et alius Ciclopa.
Hii autem duo reges irruerunt in me et meos. Uidentes
naues meas diuiciis tantis plenas exposuerunt per uiolenciam eas
|
|