IIA
Versus Paulini
(Ad Zachariam)
Hausimus altifluo perfusas rore saliuas
ore fluenta tuo labio stillante iocundo,
quae maduere meas multa dulcedine fibras,
fonte quasi flauo liquentia mella redundant.
Zacharias frater, domini uenerande sacerdos,
accola Brittaniae, Latii telluris alumne,
Hibernique decus mundi, gratissima salpix,
undisoni oceani famosus litoris hospes,
uentilabrum ecclesiae, ruralis pala uicissim
uentiuagas paleas a fuluis cernis aristis.
Mittis ad astra poli splendentis farrea grana,
flammigeras stipulas Vulcani mergis ad ollas.
Tantas ergo tibi sincero corde salutes
mandamus calami stricto ludente mucrone,
quantos mater humus uiridanti gramine flores
prorumpit teneros uernali roscida foetu,
quantas tellus habet rosulas sub stirpe roseti
seu quantae croceae pallescunt flore uiolae
purpureaeque rubent quantae per litora conchae
aut bibulas Libicus profundit pontus arenas.
Cum patris altitroni pretiosi sanguinis ostrum
aeternae prolis sacrata libas in ara,
|
|