Illius ad circi certamen delitiosum
Sponte sua cupiet currere vester equus.
Sed si tantus inest vestris genitalibus algor,
Hoc ut ad officium sis minus ipse potens,
Fomentis calidis, radicibus utilibusque
Moturis Venerem, vivificatus eris.
Denique si totus in ea sis parte peremptus,
Inde tamen Polle non odiosus eris:
Hoc ad opus numquam te forsitan illa vocabit,
Cum simili morbi clade laboret ea.
Est tibi si facies rugosa, capillus et albens,
Est et ei; friges? Frigiditate tremit.
Non ab ea poteris reprehendi frigiditatis
De vitio, vitium cum sibi presit idem.
Est cecum ceco de visus perditione
Improperare nephas: nam sua probra refert;
Quis non ridebit si claudus dicere claudo
Passibus ut rectis debeat ire velit?
|
|