15. Jam saturati estis . De quibusdam Corinthiorum
intelligendum est qui, post discessum Apostoli,
coeperunt deliciis affluere, et terrenarum opum divites
esse, sancti quoque Spiritus dona in terrenum
lucrum convertere, de quibus dicit: Jam saturati, etc.
16. Utinam regnetis! scilicet, coelesti regno, vel
ut vos ipsos bene regatis.
17. Novissimos . Apostolos suos novissimos, id
est vilissimos, apud mentes hominum infidelium
esse voluit Christus, ut majori in coelesti gloria
praemio coronentur.
18. Tanquam morti . Victorum tunc temporis moris
erat quosdam in expeditione captos morti destinare.
Ad quod spectaculum conveniebat hominum
maxima multitudo.
19. AUGUST. ( ex Tract. in Psal, XXXVIII, t. VIII). Quia
spectaculum facti sumus , angelis laudantibus, hominibus
vituperantibus, imo et angelis laudantibus
et vituperantibus.
20. LANFR. Nos stulti . Increpatio, vel ironia; non
enim Apostoli stulti, et ipsi prudentes; sed potius
stulti, et apostoli prudentes.
21. AMBROS. Vos autem prudentes . Qui prudens in
Christo judicatur a perfidis, non recte asserit
Christum. Marcion enim, qui negat Dominum incarnatum,
prudens est mundo, id est fortis et nobilis.
|
|