Moyses dedit vobis legem, et Nemo facit legem. Expone: Nemo
facit legem, idem: permittit legem fieri, cum Nemo iste sit exlex et
legem fieri nequiverit impedire. Sic exponitur illa auctoritas: Non est
malum in civitate, quod Deus non faciat, id est quod fieri non permittat.
Nemo mittens manum ad aratrum. Nam postquam de celo cecidit
iste demon, ad rem rusticam se convertit, ut in sudore vultus sui vesceretur
decetero pane suo, legi mendicitatis et paupertatis addictus.
Nemo accendit lucernam. Audite quod sequitur: et ponit sub modio,
ut cecus iste Nemo veritatem non videat que est Christus, set remaneat
dampnandus eternaliter in tenebris sui erroris.
Nemo potest dicere canticum. Verum est, set non ad laudem divinam,
quia non est speciosa laus in ore peccatoris, set ad subsannationem
et irrisionem divinam, ut iniquitatis cumulus istius miseri Neminis agravetur.
Nemo illi dabat. Glosa: Dabat callidus iste Nemo non ex caritate
Lazaro micam panis, ut guttam aque reciperet in gehenna, ad
quam se sciebat iturum.
Nemo duraturus. Glosa: in penis eternis.
Nemo est qui semper vivat. Verum est, in cruciatibus et tormentis.
Nemini permittitur binas habere uxores. Vadat ergo ad Nicolaitas
et Arabes, et luxuriosus iste ab honesto cetu Christianorum abscedat.
Nemo martires distrahat. Ergo est sacrilegus Nemo iste, qui res
sacras distrahere non veretur.
Nemo mercetur. Audite, quod intonat evangelica tuba: Ementes
et vendentes eiecit de tempio. Quomodo ergo abiit infelicissimus iste
Nemo! Profugus factus est a facie domini, in fame semper et mendicitate
victurus.
Nemo contempnat ecclesiastica iudicia. Glosa: Et sic Nemo iste
sententiam excommunicationis incurrit.
Secreta Nemini revelare. Glosa: Ut per sui loquacitatem dominorum
revelando secreta a regum catholicorum curiis expellatur.
Licet autem veridicis prefatarum auctoritatum expositionibus per
prefatum Radulfum pro suo Nemine nugis multiplicatis et repetitis
ambagibus adductarum sufficienter eidem conclusum existat, ut factus
sit acephalus armis propriis, ut Golias: ad subvertendum tamen ydolum
et cultores eius radicitus, et ut penis quas meruerunt multiplicibus
puniantur, utrorumque frontes lapillis lampidissimis de torrente aliarum
scripturarum novi et veteris testamenti e funda vindicte celestis emissis
irremediabiliter feriantur. Quantis itaque criminibus, quantisque defectibus
|
|