ecclesiam quam christiani edificaverunt tibi in Bethania, ubi Ihesus
amor divinus flevit et fratrem tuum Lazarum de monumento vocavit,
ipsam inquam ecclesiam stercoratam et stabulum animalium brutorum
inveni. O virgines sancte, Deo devotissime, que de seculo et dyabulo
simul in sexu fragili triumphastis et corpora vestra templum
Deo sancte virginitatis et puritatis consecrastis, ad vos eiulans clamito
pro tyrannide Machometi celeriter destruenda! Usquequo regnabit
super nos lubricus et obscenus, ymmo totus carnalis et infectus!
Usquequo leprosus iste contagiosus inficiet mundum! Adiuro vos
per virginitatem quam Deo dicastis, ut finem velitis imponere obscene
legi. Nonne vos monet zelus et amor puritatis et virginitatis? Nonne
videtis virgines et sanctimoniales, que fuerunt olym sodales vestre,
quomodo circumducuntur per mundum et impregnantur a Sarracenis
et ex eis generantur tyranni et satrape Sarraceni, qui contra christianos
in hostilitate alios Sarracenos excedunt? O sancti patres heremite
et anachorite, monachi, viri contemplaticii, qui longo tempore
Deo servisti, ubi sunt celle vestre? Quis modo gubernat cenobia
vestra, ubi simplicitas et abstinencia vestra? Certe successor Machometi
soldanus ille Babilonie Aman hostis noster et Christi, homo
lubricus et fictus, absque contradictione totum Epytum pacifice possidet.
O sancte Hofri, qualiter inveni cellam tuam desertam et cellas
aliorum sanctorum, qui post te ibi sanctissimam vitam duxerunt; pre
timore Sarracenorum vix audent christiani appropinquare! O sancti
doctores ecclesie, o sancti expositores sacre scripture, ad vos cum
dolore cordis clamito pro abolenda perfidia alchorani! Vos enim
multa et valde subtiliter et diserte dixistis de fide catholica, de virtutibus
et contra vicia, et ecce iam prevalet dottrina Machometi, perfidia
alchorani, que fidem vestram funditus evacuare conatur! Et, ut
de ceteris sileam, secretum trinitatis et misterium incarnacionis ita
totaliter extinguere nituntur, ut nullus unquam hereticus magis hostiliter
et efficaciter impugnaverunt fidem nostram. O sancte Augustine,
o mens illuminata a Deo, sub cujus manu et potencia est civitas
Yponensis, ymmo tota Affrica! Olym enim tantum doluisti, quando
civitas Yponensis obsessa fuit ab exercitu barbarorum, et ecce nunc
non solum obsessa, et ut ita dicam, eciam possessa cum tota Affrica,
ymmo cum magna parte mundi possessa, inquam, a Sarracenis colentibus
alchoranum, blasphemiam evangelii! O sancte Iheronime,
quantum dilexisti Effratam, quantum desiderasti Betlehem, ubi natus
est ille panis angelorun et hominum, ubi libros sanctos transtulisti
|
|