2. AUGUST. (lib. De resurr. mort ., inter frag. 31,
tom. X.) Mortificate . Spiritalia nequitiae dicit membra
super terram. Nam sequitur, et exponit avaritiam,
immunditiam, etc., quae illic exsequitur,
exspoliantes, etc.
3. LANFR. Membra vestra , id est, partes veteris
hominis, qui universitas peccati intelligitur, vel
membrorum nostrorum concupiscentias.
4. Servitus . Hoc dicit propter imagines imperatorum
quae nummis reperiuntur insculptae; unde qui
nummis inserviunt quasi idolis, et simulacris servire
videntur.
5. AUGUST. (lib. XXIV contra Faust. , tom. VI.)
Exspoliantes veterem . Veterem hominem nihil aliud
Apostolus dicit, quam veterem vitam, quae in peccato
est, in quo secundum Adam vivitur.
6. LANFR. Induentes novum , id est, induentes vos
novitatem, facite vos novum hominem.
7. AUGUST. (lib. XIV De Trinit ., c. 16, tom. III.)
Qui renovatur . Ista renovatio, est reformatio mentis
secundum Deum, vel secundum imaginem Dei; sed
ideo dicitur secundum Deum, ne secundum aliam
creaturam fieri putetur. Ideo autem secundum imaginem
Dei, ut in ea re intelligatur fieri haec renovatio,
ubi est imago Dei, id est, in mente. Non itaque
sic intelligamus secundum imaginem ejus qui creavit
eum; quasi alia est imago secundum quam renovatur,
non ipsa quae renovatur.
8. LANFR. In agnitionem . In agnitione Dei renovatur
homo ad imaginem Dei: haec est enim imago
Dei, ad quam creavit hominem, ut videlicet rationalis
esset, et coelestia semper diligeret
|
|