Ultra furias furentum furit iste rutrifer
Contra deum, contra regem delatrando iugiter.
Indignando quis non inflet buccas velut Iupiter?
Natus matre suburbana, de patre caprario
Cucullatus fecit nidum in Petri solario
Symoniace potitus eiusdem herario.
Unde delubra sanctorum deberet reficere,
Hinc hominibus suadet homines occidere.
Sed quis valet seriatim eius mala dicere?
Nabuchodonum qui vertit de rege in bestiam,
Destruat hunc monachellum, defendat aecclesiam
Et coronet regem nostrum cum filio etiam.
Vadat cesar per exempla regum precedentium,
Qui tulerunt triumphantes regiones gentium
Et dederunt possidendas turmis se sequentium.
Rex det terras, sicut boves dedit Peternatius;
Non accipere sed dare censetur beatius;
Donativis disrumpetur infelix Acatius.
|
|