id est vilitatem, si viles habiti simus, ne
frangamur.
14. Ut seductores . Quasi diceret: Non est mirandum
si vituperamur et laudamur, quia alii putant
nos seductores, alii veraces, et alii cognoscunt, et
alii nesciunt, et caetera quae sequuntur.
15. Os nostrum patet ad vos . Redarguit avaritiam
eorum, et dicit eos a se non accepisse tenacitatis
exemplum, quia cor suum in dando amplum et dilatatum
est.
16. AMBROS. Os nostrum patet ad vos . Hoc libertatis
causa loquitur, et purae conscientiae. Male [ al .,
mali] enim sibi conscia mens loqui trepidat, sensum
perdit, in verbis errat.
17. Non angustiamini . Hoc, dicit, non erat magistris
ascribendum, si discipuli male uterentur, quia
quod pertineret ad magistros non tacuerit.
18. LANFR. Non angustiamini . Id est, in nobis non
videtis angustiae et tenacitatis exemplum, sed hujus
vitii fomes est in visceribus vestris.
19. Tanquam filiis dico . Ordo: Tanquam filiis
dico habentes eamdem remunerationem scilicet,
quam nos habemus.
20. Vos enim estis templum . Probat quia jugum
ducere cum infidelibus, aequipollenter. Nullum templum
Dei debet habere consensum cum idolis; vos
autem estis templum, quia ipse habitat in vobis.
Ipse enim dixit: Inhabitabo in vobis. Propter quod
exite de medio eorum, id est, ergo nolite jugum ducere
cum infidelibus. Utitur autem verbis prophetae
pro suis.
21. Quoniam inhabitabo . Et Joel sic dicit: Ponam
tabernaculum meum in eis, et ego ero eis Deus,
et ipsi erunt mihi populus ( Joel II, 27).
22. Propter quod exite . In Isaia sic legitur: Recedite,
recedite, exite inde; pollutum nolite tangere
( Isa . LII, 11).
|
|